سیدکامران حیدرکی ناگہانی وفات ایم کیوایم کے لئے ایک بڑا نقصان ہے ۔ الطاف حسین

متحدہ قومی موومنٹ کے بانی وقائدجناب الطاف حسین نے تحریک کے سینئرکارکن اورایم کیوایم امریکہ کے جوائنٹ آرگنائزر سیدکامران حیدرکے انتقال پر دلی صدمہ اورگہرے رنج وغم کااظہارکیاہے۔ اپنے تعزیتی بیان میں جناب الطا ف حسین نے کامران حیدرمرحوم کوخراج عقیدت پیش کرتے ہوئے کہاکہ کامران حیدرمرحوم تحریک کے ایک سچے ، مخلص اوروفادارکارکن تھے، وہ پاکستان میں بھی تحریک کیلئے رات دن کام کرتے رہے، 19جون 1992ء کو ایم کیو ایم کے خلاف فوجی آپریشن شروع ہونے پر وہ 1993ء میں امریکہ چلے گئے لیکن وہاں بھی تحریک سے وابستہ رہے اور ایم کیوایم کے اجتماعات، جلسوں، جلوسوں،مظاہروں، پریس کانفرنسوں اورتمام تنظیمی سرگرمیوں میں بڑھ چڑھ کرحصہ لیتے رہے۔ 22 اگست کے بعدبھی جب بعض تحریک کے سینئر رہنماؤں اور کارکنوں نے قیادت سے لاتعلقی اور بے وفائی کاراستہ اختیارکیاتو انہوں نے قیادت سے اپنی وابستگی کو نہ صرف قائم رکھابلکہ وفاشعاری کامظاہرہ کرتے ہوئے وہ مزیدبڑھ چڑھ کرتنظیمی سرگرمیاں انجام دیتے رہے۔جناب الطاف حسین نے کہاکہ سیدکامران حیدرکی ناگہانی وفات تحریک کے لئے ایک بڑا نقصان ہے ،ان کی وفات سے میں اپنے ایک سچے، مخلص ، وفاشعاراورجانبازساتھی سے محروم ہوگیاہوں۔کامران حیدرکی وفات سے مجھے ذاتی طورپربہت دکھ اورصدمہ پہنچاہے ۔تحریک کے مشن ومقصدکے لئے سیدکامران حیدرکی خدمات یاد رکھی جائیں گی۔ جناب الطاف حسین نے کامران حیدرمرحوم کی بیوہ، بچوں،والدہ،بہنوں اور تمام لواحقین سے دلی تعزیت کااظہارکرتے ہوئے کہاکہ مجھ سمیت ایم کیوایم کاایک ایک کارکن آپ کے غم میں برابرکاشریک ہے ۔ ہم دعاگوہیں کہ اللہ تعالیٰ کامران حیدرمرحوم کی مغفرت فرمائے ، انہیں جنت الفردوس میں جگہ عطافرمائے اورمرحوم کے تمام لواحقین کویہ صدمہ برداشت کرنے کاحوصلہ عطاکرے۔